回想篇 -- 03.09.2014 -- 小明40

今日係天使一號生日, 雖然大家百無禁忌, 但佢應該開心慶生, 所以吳媽同我都唔准佢今日嚟探病, 哈哈!   老友記:　Happy Birthday To You!!

取而代之, 細佬弟婦老媽子嚟左探我~ 仲有保險李太, 同樣客氣地比了一封利是我~

可能細佬們見我咁虛弱, 怕我出院後行動不便, 呢個時候佢地商量要買張輪椅比我.... 又令我超感動!  事實上, 作為病人的我實在需要別人照顧, 因為我仍未看到康復進度!

除了家人和天使一號之外, 另一位我相信係天父賜我的天使 ---> 美麗善良的學妹麗明~

其實畢業後一直無見過面, 讀書時也不相熟, 但佢個樣跟讀書時一樣 (劉同學:你真有眼光呀！ 呵呵!)

今年初同學南丫大旅行時, 我跟麗明再見面, 傾談後得知佢响浸會做護士。所以8月份當我要搵婦科醫生的時候, 都問過麗明意見!　原來佢跟為我做手術的婦科腫瘤科鄭嘉樑醫生以＂老友記＂來相稱；麗明也向手術室的同事＂單＂了一聲，幫忙多加照顧我！　實在感恩！！

呢幾日, 佢經常過嚟病房探我~ 今日全靠佢鼓勵我要坐起嚟[因為手術後我都唔敢落床, 怕整親傷口]~  佢比左好大信心我, 同時扶我和教我用什麼方法唔會整到傷口, 就這樣..... 成功坐了起來, 為左紀念呢一刻, 我地影左呢張相!

麗明, 多謝妳成為我的天使!!!

回想篇 -- 手術後第一天 (02.09.2014)

昨日手術後雙腳一直穿著的壓力襪沒有除下, 反加多了一雙感覺似被按摩的東西, 時而收緊時而放鬆, 蕭醫生話它是幫助血液循環, 避免淋巴水腫~

........ 就這樣, 昨晚睡得十分差!

肚皮被一層又一層的膠布蓋著, 其中一隻手又插了豆豆吊鹽水, 下身又插了尿喉, 全身動彈不得.............總之就係十分唔舒服!

醫護人員每隔一小時為我量血壓, 每三小時探熱~  還有她們要為病房中的另兩位病友定時檢查, 所以每當入睡便被儀器推來推去的聲音嘈醒!   但... 最可怕的事過後幾日才發生!!!

今日天使一號和吳媽嚟探我, 由於我仍然十分虛弱, 只能氣弱猶絲地對答, 吳媽更比左一封利是祝福我~ 好感動!

一開手機收到很多很多what's app, 有平時很少聯絡的舊同學~ 家人~ 親戚~ 同事~等等~ 全都係關心問候的鼓勵; 但我實在太...太....太.....弱, 未能即時回覆!

感動仍在心中~

回想篇 -- 手術日 (下) 01.09.2014

"詠嫻, 醒哪! 做完手術哪!" 耳邊傳來姑士那溫柔的聲音....

由於麻醉藥未過, 我無力睜開眼, 只感動被移動過了床和病床正被推動著 -- 我想大概是回病房吧!   當我被推出手術室後第一眼就見到K, 佢雙眼通紅, 我肯定佢係喊過, 但我太虛弱, 望了他一眼便閉目養神了!

當時我最關心0既係惡性定良性呢?  只要我知道手術完成時間, 那我就知道了... 可惜連開口問K的力氣都沒有!  唯有同自己夾定, 返病房會路經那掛在牆上的時鐘, 我一定要努力的睜開眼啊!

............時鐘指著12:10分..................


我知道了結果... 有點失望.........

這天, 手機收到了很多what's app問候, 但我無力回覆, 就這樣............手術後一直睡到晚上!

回想篇 -- 手術日 (上) 01.09.2014

依照醫院姑娘昨天的吩咐, 今早大約0700起身梳洗; 心情仍然十分十分緊張, 因為好希望手術的化驗結果係良性, 但其實那一刻我可以做的, 只好全然用祈禱交託比天父!

手術由0830開始, 之前跟蕭醫生會診時, 她講解過會先由肚劑下開一小刀, 把右邊的腫瘤拿出來做冷凍切片化驗, 需時大約20分鐘就可知結果.  如果良性的話, 那手術時間一小時就可完成! 

但如果惡性的話, 會把範圍再往下開刀, 把子宫, 兩邊卵巢, 胃網膜, 盲腸和淋巴都一併切除; 手術時間會延長多3小時!

自21歲那年動過手術之後 (生bb不計), 今次係生平的第二次, 還記得當年被推入手術室時那種冷冰冰的感覺 -- 穿著手術袍在病床經過數道走廊, 視線只望著白色的天花板, 在手術室等待被宰割的可怕感覺 =_="

事隔19年, 同一間醫院, 發覺跟當年的感覺不一樣了!

首先, 著上了醫院提供的一雙手術襪以作保暖, 沒有了冰冷的感覺.  被醫護推進了手術室門外等候, 發覺那裡很熱鬧, 人來人往的, 不知是否星期一的關係, 有很多手術排著隊做呢!

事實上, 那裡有很多病人跟我一樣, 已被安排在手術床上等著入手術室的!  醫護人員向我核對個人資料, 然後麻醉醫生又過來自我介紹和再次跟我核對個人資料; 再過一陣, 到蕭醫生在我眼前出見打了個招呼, 我還問蕭醫生昨晚睡得好嗎? 吃飽了早餐嗎?  以個人經驗, 星期一對於工作的人來說是特別無精打采的, 這天手術時間0830, 我有點替醫生的精神狀態擔心..... 過後, 我發覺這只是我的過份憂慮, 蕭醫生真是非常專業!

沒多久我被推入手術室, 那裡已有一隊醫療團隊在等候, 聽到麻醉醫生跟身邊的醫護說, 稍後要把我左手的豆豆需要轉移到右手; 同時間另有兩位醫護左右分工為我穿上壓力襪, 我感到手術快要開始了........ 然後麻醉醫生叫一位醫護把氧氣罩放在我鼻咀之上, 說那是氧氣, 但我覺得奇怪, 唔明白為何要戴氧氣罩?!  哇!!!!!!!!!!!!!!! 不消數秒, 我就無了知覺.......

我懷疑那就是迷魂劑!!!!!!

回想篇 -- 入院的第一天 (31.08.2014)

依照醫生安排, 朝早11點就要到醫院check-in~  當我出門的一刻, 我就知道有排都返唔到屋企, 因為唔知道要留醫幾多日~ 一諗到肚皮快要開刀就好驚!

向入院部要求有窗的病房, 可惜他們話已滿, 但會盡量安排!  直到１２：１０分，被安排左一間只有假窗的三人房~ 但呢間病房人少少, 洗手間都很乾淨, 感覺良好!

可能天父體恤我愛整潔, 有此安排~ 因為三人房的價格比起大房貴的, 但由於大房滿了, 醫院安排提供三人房, 所以沒有額外收費啊~

下午3時開始, 護士為我輸血~一包血需時３小時，所以要晚上９點半才完成輸兩包血！　
只飲血就夠營養，不用進餐啦，哇哈哈！

自從21歲做過手術後, 19年來除了生BB要留院之外, 未有再入院~

由於心情又驚又怕又緊張, 昨晚在家睡前不停祈禱, 求天父看顧我, 希望主憐憫和保守手術的過程~ 當我將所有都向神傾訴, 要說"阿們" 的時候~ 有把聲音話：
＂孩子，放心吧！你的信救了你！＂

我立即張開眼晴，我是清醒的~  我無聽錯... 一定無聽錯!  雖然周圍沒人，但肯定係聽到剛才那句說話的！我要強調：我沒有幻聽....妄想症或者精神病的~

好神奇.... 信主多年從未經歷過; 就這樣......... 入院前一晚我能安心地入睡~　

數天後。。。引証到神那句說話是真的！！

全日只有Ｋ陪著我，直至天使1號晚上嚟醫院探我, 佢帶來了一堆日用品~  其中有些更係我沒有準備但又真係好啱用的東西~難得好朋友知我一向潔癖, 她所準備的十分合我意　——　超感動啊!

醫院探病時間朝十晚十，佢地走左之後，我睇聖經和祈禱，然後安心地睡覺！

~枕頭係我私伙帶去架~

回想篇 -- 25.08.2014 (下)

等到大約12點左右, 護士叫我入去, 先在一條長長走廊的椅坐下再等候安排~

5分鐘後入去見蕭醫生~  對比起19/8那位婦科醫生, 蕭醫生的衣著十分像樣, 外表看來十足是一位專業醫生, 架上黑框眼鏡, 外表優雅淡定, 談吐也很有說服力, 手上戴上Cartier最新款婉表...........總之她就有那種令人攝服的感覺!

超聲波檢查完成後, 回到她的辦公桌詳細傾談~ 醫生話我右邊卵巢上的腫瘤"的確生得很肉酸" =_='

我問那腫瘤的體積跟我於19/8在另一婦科所check到的, 有否變大呢?   醫生答"無"~

然後她開始詢問和了解我各樣那樣的病歷和背景. 我交上了CA125的驗血報告, 醫生同意我的情況是有做手術的必要, 她估計有50-60%係惡性, 但都要視乎手術過程做冷凍切片化驗後才可確定~

由於26-30/8我有事要忙, 我同醫生講, 只要醫生時間許可的話, 31/8之後日子, 我可隨時入院動手術 [其實自從19/8那天起, 我已經慢慢做心理準備, 接受要做手術的事實!!]

蕭醫生思考了一陣, 說她需要另一位婦科腫瘤專科醫生一起為我動手術~ 她說可以於浸會醫院排腫瘤快期;  同時她先向我報個價,  讓我有個預算!

最後她吩咐我出去再等候 (我估計讓護士們聯絡醫院和她所講的腫瘤專科醫生吧!)

等了一陣再入去見醫生, 她話安排了31/8入院, 1/9上午0830動手術; 由於我血色素很低, 所以31/8入院當日主要係接受輸血 (兩包) 和晚上通便..................我聽到通便我就怕, 因為咁大個女未試過.........死死!!!!

然後蕭醫生很詳細地講解了手術詳情和風險, 哪部份器官會被切去......及簽下手術同意書等等~

當簽同意書等等文件的過程中, 我發現入院紙上我個名其中一字寫錯, 告訴蕭醫生, 她搖頭望一下身旁的護士, 加上眼神有點凌厲, 我立即解圍地話可能係我在登記表上寫得不清楚吧!  然後蕭醫生望了我的登記咭, 就話"唔係妳錯!"

說時遲那時快, 在她身邊的護士馬上遞上改錯帶..... 我心諗, 嘩! 改錯帶都有專人遞上, 好利害啊!  換著我係護士一定好驚, 跟著一個要求高的BOSS 好大壓力啊!

但另一方面, 我明白要求嚴格有它的好處, 至少對於作為病人的我是得益的!

雖然我對蕭醫生過往的醫術一無所知; 只係經同事C介紹, 但當我睇到以上微不足道的事, 不期然對蕭醫生充滿信心!

人在細微處也這樣嚴謹, 在大事上就更有高要求啦!

我很放心地離開診所回公司, 快手快腳完成未做的公事, 因為明天開始休假; 根據蕭醫生話, 手術後至少兩個月康復期, 所以我都通知了個別跟我在公事上有接觸的同事!  至於我的老外BOSS, 19/8我已通知佢我的病情, 叫佢儘快安排 BACK UP, 佢話OK!

講開又要講吓~ 我响呢間公司做了８年，從來係都無人BACK UP我的, 每次放完假後都係自己執"屎"; 嘿! 好在我有一句座右銘 --求人不如求己!

但今次我要放一個咁長的假期, 逼老闆點都要諗諗~

回想篇 -- 25.08.2014 (上) 第二次確診

今早10點就到了蕭景生醫生診所, 未見其人, 單看診所規模已覺得呢位醫生好本事~ 因為診所至少由兩至數個單位打通而成, 眼看的護士人多至少八位, 牆上除了貼滿醫學文憑和專業資格之外, 又貼滿了病人送給醫生的Thank you card等等, 而候診室也坐滿了等候看診的病人!

由於我沒有預約記錄, 向護士道明我的"故事"後, 她說醫生還未返到診所, 叫我可以响附近先找地方早餐, 一小時後再回診所!

於是我在附近跟K飲個早茶, 其實心情也是很緊張, 好希望係先前嗰位醫生睇錯, 又好希望個腫瘤消失左~

回想篇 -- 24.08.2014

今日係我正日生日啊! 好想去陽光與海灘的地方, 望海都可以!
於是選了西貢呢個地方. 食海鮮餐慶祝生日吧!!!!!

人到40才發現"可能"患cancer, 心情很忐忑不安, 但當望上天空, 令我諗起一首詩歌--------
"雲上太陽"~

無論是住在, 美麗的高山,
或是躺臥在陰暗的幽谷;
當你抬起頭, 你將會發現;
主已為你我而預備~x2

雲上太陽, 它總不改變,
雖然小雨灑在臉上,
雲上太陽, 它總不改變, 哈哈....它不改變!

回想篇 -- 22.08.2014

今日同事們為我預祝生日, 一行多人去了lunch~ 可惜當到達酒樓前, 我接到家庭醫生電話, 因為早兩日我去診所, 由呢位醫生寫紙比我去抽血驗CA125 (由於係公司醫保名下醫生和化驗所, 所以只付公司咭, 不用自付, 免卻了申請報銷的手續)~

醫生問我今日有冇時間去見佢, 我答"今日唔得喎"..... 我心諗... 死火嘞! 醫生親自打嚟, 一定唔係好消息 @_@

然後醫生話"咁我阻你幾分鐘, 而家電話講啦"~ 佢話我驗血報告到左, 正常指數係35以下, 但我指數係340~

我心一沉!!!!!!!!! 好驚!!!!!!!!!!!!!!!!!!!!!!!! 面都青晒!!!

醫生話叫我儘快去搵番之前個婦科醫生安排做手術~ 當時我都方寸大亂~ 腦中一片空白!

聽完個電話, 我步入酒樓, 為免同事們以為我唔開心, 我暫時收起憂慮表情, 勉強地食完呢餐"特別"的生日飯!

坦白說, 對於早幾日的婦科醫生冇信心, 我只係第一次見佢, 又覺得佢係特登講到我情況咁嚴重, 想做"生意"啫!   但而家我應該點做呢..... 癌指數又咁高.....我心慌意亂下問了身邊的朋友, 表妹和我認為有可能幫到我忙的, 我都問了她們有關意見~

同時, 我也打比保險agent, 問佢有冇相熟或者信譽好的婦科介紹?!

點知佢所介紹的醫生, 跟我同事C所推介的一樣 [最近我跟C傾計比較多, 保險 agent都係C介紹比我, 而呢位醫生都曾經幫佢做手術]

就因為咁~ 我就一於打去診所預約吧!

可惜姑娘話, 醫生booking full晒, 最快要到29/9....................唉! 我心諗要等咁耐, 可能我都死左...我等唔等到咁耐架??????????!!!!!!!!

於是我照家庭醫生教路, 响電話同診所姑娘講病況和驗血報告, 希望可比個快期我啦~

後來, 姑娘叫我等等 (可能佢要向醫生請示); 然後准許我下星期一(25號) 10點到診所等 walk-in; 但有機會要等幾個鐘才輪到我, 因為其他病人一早預約了!

我當然明白啦, 只要有機會, 我都唔會放棄...等就等吧!  因為聽同事C講, 呢位醫生相當不錯!

回想篇 -- 19.08.2014 (第一次確診)

夜校功課終於响８月初完成，呢幾星期係"抖暑"~ 因為學校比我地準備快到的EXAM~ 然後1/9就開新 SEMESTER~

所以上星期我瘋狂地上網找婦科醫生, 目標係今日一定要完成做檢查~　因為我知道打後有排忙, 分身不暇!!!  而且下月份公司MEDICAL又到一年一度的CUT OFF~

响 HK DOCTOR LIST網不停搵, 不停打電話問~ 首選想搵女醫生, 最好診所位置响九龍區!
殊不知....原來有些醫生放緊暑假, 有些醫生今日的BOOKING 已 FULL晒~最快要９月先有得睇!

千辛萬苦，踫到有位女醫生比到今日個期我，所以今日下午去了見佢～

呢位醫生外貌跟一般家庭主婦無異，已年過５０!  不過我心諗唔緊要啦, 做基本檢查啫.....又唔係咩事....

當做 Ultrasound時, 醫生話左邊卵巢OK, 但佢皺著眉頭話我右邊卵巢唔係好尋常........................................開始驚了!!!!!

後來醫生print out 幾張圖出嚟同我傾, 只睇Ultrasound, 唔會知個瘤係良性或惡性, 佢提議我做手術同時抽血驗CA125, 又話最好快啲動手術......吓!!!!!!!!!!!!!!!!!!!!!!!!!!!!!!!!

聽完佢講, 我0既感覺係佢想做成呢單"生意"罷了...所以我冇照佢提議上佢介紹的化驗所抽血!
離開診所後我繼續下一個行程~

回想篇 -- 11.08.2014

下午放假, 因為要去問政府借錢交學費~ 好好善用免入息審查貸款的幫助~仲有4個modules就畢業, 一定要比心機讀好佢~

搞掂晒就返屋企~  因為好攰~ 冇耐覺得好眼瞓, 睡魔急call zzzzz
點知瞓到5點幾, 覺得好熱, 好似發燒@_@

原本要外出的行程唯有取消~第一時間打比囝囝報告佢知~ 囝囝仲擔心我係咪染左"伊波拉"病毒~ (其實我都驚架!)

然後我攞探熱計check吓~ 嘩!差唔多102C~ 好驚!

係咁諗....死死.... 究竟係咩原因發燒呢???  又無傷風丫～無啦啦發燒都幾驚。。。。後來終於幫自己諗到個"原因" ———＞ 估計應該係昨日去了譚X食米線, 豬潤唔太熟所引起~

食左退燒藥就繼續瞓~ 好彩夜晚再冇燒了!

[嘿嘿....後來所發生0既事就知道原來今次發燒原因係咁大件事.. 今次係身體預警... warn我!]

第五次中醫

劉教授只係逄星期一, 三在廣華應診, 其他時間在黃大仙醫院, 今早9點半出發去見醫師~
請了病假一個多月, 習慣了自然醒, 但當要返醫院覆診或者好似今日要睇中醫的話, 就要比鬧鐘叫醒, 心理上總有點壓力~ 況且有很多晚瞓得唔好, 我估係同更年期有關~

今日係節氣中的"霜降", 即係開始由秋入冬, 怪不得感覺又涼左啦~

坐車一來一回真係有點攰～所以整個下午0既任務係飲中藥同好好休息, 因為下星期又抽血了~希望合格吧!!

新癌症病人小組

下午到醫院參加小組, 計埋我只得三位, 真係少得可憐!  我估可能其他病友唔得閒掛!!
聽社工和護士講解有關資料, 又派發了一些單張, 營養奶粉和頭巾, 為時一個多鐘頭的小組就結束了!

這幾天兩大書局大減價, 我狂買左好多本旅遊書番嚟~ 以往好少買旅遊書, 因為寧願花錢真實去旅行好過~  但事實上........ 過往多年又好少遠行~

今次得到呢個病, 就當比自己一個目標, 希望完成六針化療後, 明年就開始一年一旅行大計!

人到中年, 歐洲國家除了去過英國之外, 其他都未去過, 真係有點失敗 =_='

我已立志----從今以後, 我目光要放遠一點, 用有限的生命做多點自己喜歡0既事, 唔會再比啲怪獸影響自己~

有時, 我懷疑過去咁多年生活得咁唔開心, 又活在巨大壓力之下, 係令我有癌病的其中一個原因!! 所以今後我要活得開開心心, 快快樂樂!   一定唔可以比啲不知所謂0既珍禽異獸影響我!!

回想篇 -- 07.2014

臨近收工時間, 雙眼突然間好似比閃光燈閃完咁, 眼前出現兩道白光, 望住電腦仲好似係有塊放大鏡個影像前面..... 嗰一刻好驚!!   我以為係雙眼太攰, 所以合起兩眼休息左一陣....但幾分鐘後情況持續係咁~  我驚到向坐我前面個同事求救....想佢幫我睇吓公司本醫生小冊子, check吓公司附近有邊位眼科....

可能快到放工時間, 嗰位同事忙住做嘢, 我未及開口, 換來佢回應係"你休息吓先, 可能陣間冇事呢!"  =_="

唉... 心諗反正診所都差唔多關門, 算啦.... 如果萬一有事就入急病室吧!   直到放工一刻, 居然情況又好左少少~

但始終係有生以來第一次咁樣, 我好怕會盲左... 又懷疑會否係什麼視網膜脫落或者黃斑點病變之類的問題出現...............................總之仲係驚到震~

晚飯時間食乜都冇味, 又冇心機～好擔心! 又猶豫究竟應唔應該去睇急症呢??!!

於是，唯有用what's app向｛中學萬能谷｝求救, 正如恩B所講 "識人好過識字"~最後响一位善心男同學平安BEL幫忙下, 安排了翌日早上排第一位見眼科醫生~

第二朝晨早出發, 經過一輪檢查, 醫生話一切正常!  醫生話我0既情況應該係偏頭痛引致~  咁我諗吓又係, 琴日係頭痛完就出事了!

放心晒~原來係自己嚇自己啫！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
果次之後直至８月初，斷斷續續都再次出現閃光情況，但發覺都係頭痛出現然後咁樣，所以我無再理會；當時又因為忙於趕交夜校功課，已令我無時間理會，絶對無想像過會跟CANCER扯上任何關係！

第四次中醫

多得恩B介紹, 自22/9起開始去廣華醫院中醫部睇, 為接下來的化療調理好身體!
其實我一向都唔抗拒飲中藥, 加上今次廣華處方係農本方沖劑, 我覺得味道似奶茶, 好易入口~

由於受"佔旺行動"影響, 巴士線改道, 所以响柯士甸道落車然後行去佐敦再轉一個站MTR去油麻地~可能我冇食早餐, 行到去醫院附近我開始覺頭暈~ 今日係星期一診所特別多人, 幸好前後大約半小時就完成付款-->診症-->取藥-->走人!!

上星期已約好了"天使1號"阿欣(真名:小明) 今日睇中醫後, 帶貓婆婆去勝利道配眼鏡, 間眼鏡舖果然係"老"字號~外貌雖舊, 但原來已經營了30多年!
的確貨真價實~只花了＄１１００就配了一副漸進加全線視鏡片連鏡架, 抵到爛呀!!!

之後我地一行3人去了北京樓開餐, 天使1號堅持要找數, 佢既理由我實在拗唔嚟, 所以唯有下餐到我出手吧, wakakakaka!

圖中每款點心我都有食, 那碟尤魚鬚係我至愛..... 今日能夠再次品嘗得到, 十分滿足!
其實自手術後我都盡量介口, 至今已第7星期, 我就破介一次吧!!

回想篇 -- 18.04.2013

自2007年跟好朋友天使一號去完政府診所普查做栢氏抺片檢查後, 咁多年以嚟一直很懶去做婦科檢查!

今日終於"的"起心肝, 去睇早前已預約好既公司醫療保險屬下既婦科.

嗰位女醫生木無表情, 我原本以為女醫生會溫柔一點.......其實我心情已經很緊張, 見到佢就仲緊張.....到而家都記得佢個樣 =_=

檢查過後, 醫生話子宫有幾粒大約 2cm 既水瘤~ 我問佢駛唔駛做手術呢?
佢話唔駛喎, 但半年後要再照吓, 通常呢d水瘤會响更年期自動萎縮 (消失).....

安心晒!  享受完公司"福利" 後, 了左2013年其中一個goal!

N.B, 公司 medical scheme每年9月底就cut off, 之後所睇既醫生次數會從頭計過~

休息日

昨半夜差唔多兩點先瞓得著, 但今朝7點幾就比隔離鄰居嘈醒, 之後就再瞓唔到了!

Hea到11點幾先起身, 食完個brunch又上一陣網, 冇幾耐睡魔急call~
瞓左大約一個鐘, 收到細佬what's app, 佢問我有無記低患病經過, 話第日可能幫到人....

其實我有諗過, 但自患病後身體和精神一直都唔好, 正所謂有心無力! 何況.... 其實我唔識寫Blog~

除左工作和做夜校功課以外, 我甚少上網睇blog, 而家仲要寫一個屬於自己0既 blog, 真係有點難度!

但係經細佬問一問.... 我諗都係時候動下手!  坐言起行吧~ 哈哈!!!

既然有難度, 就要勇於挑戰一下自己吧!

下午花左一輪時間"研究", 我的第一篇網誌出世哪!!!!!!!!!!